Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi ilə "Birgə və Sağlam" İctimai Birliyinin birgə təşəbbüsü və “Trendyol”un dəstəyi ilə əlilliyi olan uşaqların valideynləri üçün maarifləndirici təlim keçirilib.

Əlilliyi olan şəxslərin də çalışdığı inklüziv “Kaşalata” kafesində təşkil edilən təlim “Əlilliyi olan uşaqların valideynləri üçün stress menecment və dayanıqlılıq strategiyaları” mövzusuna aid olub. 

Nazirliyin Əlillik siyasəti şöbəsinin əməkdaşı Günay Hüseynova, Mərkəzin Sosial pedaqoji inkişaf və sosial psixoloji dəstək departamentinin əməkdaşı Aydan Salmanova mövzu ilə bağlı təlim iştirakçılarına ətraflı məlumatlar veriblər. 

Valideynlərlə interaktiv müzakirələr aparılıb, onların sualları cavablandırılıb.

Daha sonra Mərkəzin təlimçi və benefisiarları, “Birgə və Sağlam” İctimai Birliyinin üzvlərinin ifasında konsert proqramı təqdim edilib.

Tədbir inklüziv cəmiyyətin inkişafına birgə töhfə vermək, əlilliyi olan şəxslərin valideynləri üçün dəstək mühiti yaratmaq, onların məlumatlılığını artırmaq və sosiallaşmasını gücləndirmək məqsədi daşıyıb.