Birmingem Universitetinin alimləri müəyyən ediblər ki, flavanolla zəngin məhsullar, məsələn, çay, kakao, alma və giləmeyvələr uzun müddət oturaq vəziyyətdə qalmanın damarlar üçün mənfi təsirini azalda bilər.

Tədqiqatın nəticələri “The Journal of Physiology” jurnalında dərc olunub.

Müasir insan gün ərzində təxminən altı saata qədər oturaq vəziyyətdə vaxt keçirir. Bu cür azhərəkətlilik damarların fəaliyyətinin zəifləməsinə gətirib çıxarır. Arteriyaların elastikliyinin cəmi bir faiz azalması insult və infarkt da daxil olmaqla ürək-damar xəstəlikləri riskini 13 faiz artırır.

Tədqiqatçılar flavanolla zəngin qidaların bu zərəri kompensasiya edib-etmədiyini araşdırıblar. Flavanollar meyvələrdə, çayda, qoz-fındıqda və kakao dənələrində mövcud olan, damarları möhkəmləndirən və stres zamanı onları qoruyan təbii birləşmələrdir.

Eksperimentdə 40 sağlam kişi iştirak edib ki, onlardan 20-si yüksək, 20-si isə aşağı fiziki hazırlığa malik olub. Onlar iki saatlıq oturaq testdən bir saat əvvəl ya flavanolla zəngin kakao içkisi (695 mq), ya da çox az flavanol tərkibli (5,6 mq) içki qəbul ediblər. Daha sonra alimlər damar elastikliyini, qan axınını, təzyiqi və əzələlərin oksigenlə doyma səviyyəsini ölçüblər.

Nəticələr heyrətamiz olub. Aşağı flavanol tərkibli içki qəbul edənlərin damar funksiyası oturaq vəziyyətdən sonra pisləşib, belə ki, qan axını və arteriyaların elastikliyi zəifləyib. Lakin flavanolla zəngin içki içən iştirakçılarda bu cür dəyişiklik müşahidə olunmayıb, onların damar göstəriciləri iki saat hərəkətsiz qalmağa baxmayaraq eyni səviyyədə qalıb.

“Orqanizm kifayət qədər flavanol qəbul etmirsə, yüksək fiziki hazırlıq belə uzun müddətli oturma zamanı damar funksiyasının müvəqqəti pisləşməsindən tam qorumur”, – deyə Birmingem Universitetinin fiziologiya professoru Sem Lukas qeyd edib.

“Biz günün çox hissəsini masa arxasında, avtomobildə, evdə oturaq keçiririk. Hətta istirahət zamanı da orqanizm stres yaşayır. Gündəlik qidalanmaya flavanolla zəngin məhsulların daxil edilməsi damar sistemini qorumağa və ürək xəstəlikləri riskini azaltmağa kömək edə bilər”, - deyə tədqiqatın aparıcı müəllifi doktor Katarin Rendeiro bildirib.