ABŞ-ın Meyo Klinikasında aparılan yeni tədqiqat göstərib ki, 65 yaşdan kiçik qadınlarda infarktların təxminən yarısı ənənəvi arteriya tıxanması ilə bağlı deyil, başqa mexanizmlərlə bağlıdır.

Gazette.az xəbər verir ki, tədqiqatın nəticələri “Journal of the American College of Cardiology” (JACC) jurnalında dərc edilib.

Alimlər 2003–2018-ci illərdə Minnesota ştatında baş verən 1474 infarkt hadisəsini analiz ediblər. Kişilərdə infarktların 75 faizi aterotromboz, yəni tıxanmış damarlar içində qan laxtalarının əmələ gəlməsi ilə bağlı olub. Qadınlarda isə bu səbəb yalnız 47 faiz hallarda müşahidə olunub. Qalan hallarda isə spontan koronar arter disseksiyaları (SCAD), emboliyalar və ya stres faktorları, məsələn, anemiya aşkarlanıb.

Həkimlər xüsusilə qadınlarda bu halları səhvən tromboza bağlayırdılar ki, bu da yanlış müalicə taktikasına səbəb ola bilərdi. Kardioloqlar bildirirlər ki, infarktın alternativ səbəblərini tanımaq təkrar halların qarşısını almaq üçün həyati əhəmiyyət kəsb edir. Tədqiqat müəllifləri həm tibbi personalın, həm də xəstələrin məlumatlılığını artırmağa çağırırlar, çünki infarktın əsl səbəbini başa düşmək xəstəliyin nəticəsinə birbaşa təsir göstərir.