Tovuz rayonunda yerləşən Central Hospital Əyyublu klinikasında növbəti “Erkən müayinə can qurtarır!” adlı səyyar tibbi müayinə və maarifləndirmə aksiyası keçirilib. Aksiya “PAŞA Holdinq”, Səhiyyə Nazirliyinin dəstəyi ilə reallaşıb. Tədbirin əsas məqsədi regionda ictimai sağlamlıq savadlılığını artırmaq, erkən diaqnostikanın əhəmiyyətinə diqqət çəkmək və əhaliyə əlçatan tibbi xidmət imkanlarını genişləndirməkdir.

Gün ərzində, saat 10:00-dan 18:00-dək keçirilmiş aksiyada Tovuz rayonu və xüsusən Əyyublu kənd sakinləri aktiv iştirak edib. Tibbi xidmətlər tam ödənişsiz şəkildə təqdim olundu və aşağıdakı əsas istiqamətləri əhatə edib:

• Qanda şəkər və arterial təzyiqin ölçülməsi;

• İlkin laborator analizlər;

• Terapevt və endokrinoloq müayinələri;

• Pediatrik müayinələr;

• USM diaqnostikası;

• Ginekoloji müayinələr;

• Travmatoloji müayinələr;

• Oftalmoloji müayinələr;

• Tibbi məsləhət və yönləndirmələr.

Səyyar tibbi heyət tərəfindən risk qrupuna daxil olan şəxslər müəyyənləşdirilərək, onlara fərdi sağlamlıqları ilə bağlı tövsiyələr verildi. Qanda şəkər səviyyəsində pozuntular aşkarlanan şəxslərə qlükometr cihazları hədiyyə olunub. Bu, onların gündəlik qlikemik nəzarətini asanlaşdırmaqla yanaşı, uzunmüddətli fəsadların qarşısının alınmasına yönəlmiş mühüm addımdır. Əlavə olaraq azyaşlı pasiyentlərimizə rəngləmə kitabçaları və rəngli qələmlər təqdim edilib.

Tədbirin ünvanı:

Tovuz rayonu, Əyyublu kəndi.

“Fərqindəlik” layihəsi çərçivəsində növbəti oxşar səyyar tibbi aksiya Şəki rayonunda nəzərdə tutulub.