Hərəkət zamanı insan beyninin müəyyən istiqamətlərdən gələn səsləri avtomatik olaraq daha güclü qavradığı aşkar edilib, sanki diqqət eynilə heyvanların qulaqlarını tərpətməsi kimi “çevrilir”. Almaniyanın Vyurtsburq Universitetinin alimləri Bu nəticəyə gəliblər.

Tədqiqatın nəticələri “The Journal of Neuroscience” (JNeurosci) jurnalında dərc olunub.

Araşdırmada mobil elektroensefaloqrafiyadan (EEQ) istifadə olunub ki, bu da hərəkət zamanı beynin aktivliyini ölçməyə imkan verib. Simsiz EEQ və hərəkət sensorları ilə təchiz olunmuş könüllülər “səkkiz” formasında marşrut boyu hərəkət edərək qulaqcıqların vasitəsilə səsləri dinləyiblər. Nəticələr göstərib ki, gəzinti zamanı beyin audiosiqnalların emalını gücləndirir, xüsusilə də insan dönərkən diqqət yeni istiqamətə yönəlir.

Alimlər bildirirlər ki, insanlar təxminən 25 milyon il əvvəl qulaqlarını tərpətmək qabiliyyətini itirsələr də, insan beyni bu funksiyanı kompensasiya etməyi bacarır. Belə bir “daxili qulaq dönüşü” dəyişən mühitdə reaksiyanı sürətləndirən təhlükəsizliklə bağlı təkamül mexanizmi ola bilər.

Tədqiqat həmçinin təsdiqləyir ki, hərəkət yalnız bədənə deyil, beyinin fəaliyyətinə də təsir göstərir. Əldə olunan nəticələr görmə pozğunluğu olan insanlar üçün yeni naviqasiya sistemlərinin və hərəkət istiqamətinə uyğunlaşa bilən daha “ağıllı” eşitmə cihazlarının hazırlanmasına əsas ola bilər.

“Bu nəticələr həmçinin izah edir ki, niyə açıq havada gəzinti beyinə idman zallarındakı məşqlərdən daha çox fayda verir, belə ki, hərəkət qavrayışı dəyişir və beyin fərqli işləyir”, – deyə alimlər yekunda qeyd ediblər.