Birləşmiş Ərəb Əmirlikləri (BƏƏ) ilə İsrail arasında Dubayda azad ticarət haqqında müqavilənin təntənəli imzalanma mərasimi keçirilib.

Gazette.az xəbər verir ki, məlumatı “newsru.co” yayıb.

Sənədi İsrail tərəfdən ölkənin ticarət naziri Orna Barbivay və BƏƏ-dəki səfir Amir Hayek imzalayıb.

BƏƏ və İsrail arasında azad ticarət haqqında müqavilənin razılaşdırıldığı bu il aprelin 1-də elan edilmişdi. Sənəd hər iki ölkənin parlamentləri tərəfindən ratifikasiya edildikdən sonra qüvvəyə minəcək.

Müqavilədə BƏƏ ilə İsrail arasında ticarət münasibətlərinin, dövlət sifarişlərinin həyata keçirilməsinin əhəmiyyətli dərəcədə sadələşdirilməsi, gömrük məhdudiyyələrinin götürülməsi, onlayn ticarətin tənzimlənməsi və intellektual mülkiyyətin hüquqularının qorunması kimi məsələlər nəzərdə tutulub.

İsrail hökumətinin dəftərxanasından bildirilib ki, İsraillə BƏƏ arasında ticarət dövriyyəsinin 95 faizi gömrük rüsumlarından tamamilə və ya tədricən azad ediləcək. Bura ərzaq, kənd təsərrüfat məhsulları, kosmetik, tibbi avadanlıqlar, dərman preparatları və s. daxildir.

Qeyd edək ki, BƏƏ İsraillə azad ticarət əlaqəsi haqqında müqavilə imzalayan 46-cı dövlətdir.