Oktyabrın 10-da Azərbaycan Turizm Blogerləri Assosiasiyası (ATBA) 5 yaşını qeyd edib. Bu münasibətlə təşkil olunan yubiley tədbirində Assosiasiyasının təsisçiləri və üzvləri iştirak ediblər. 

Qeyd edək ki, 50-ə yaxın tanınmış turizm blogerinin üzv olduğu Assosiasiya 2020-ci ildə tanınmış jurnalist, səyyah, bloger Azər Qəribin təşəbbüsü ilə təsis edilib. 

Gecədə açılış nitqi ilə çıxış edən Assosiasiyanın sədri Azər Qərib 5 il ərzində ATBA-nın keçdiyi yol, Azərbaycanda turizmin inkişafı üçün həyata keçirilən layihələr, görülən işlər, qazanılan uğurlar barədə məlumat verib:
 
“ATBA bu beş il ərzində xeyli yol qət edib. Bu gün ən tanınmış səyahət blogerləri bizim üzvlərimizdir. Biz daxili turzimin inkişafına dəstək vermək üçün müəyyən işlər görmüşük. 2-ci Qarabağ müharibəsinin olduğu və pandemiya dövründə  yaranan Assosiasiyamızın ilk addımlarını atdığı günlərdə səyahət etmək çox çətin idi. Amma bu gün işğaldan azad olunan torpaqlarımızın turizm ehtiyatlarının tanıdılması, təbliğ olunması istiqamətində işlər görürük. Bu, çox qürurvericidir". 

ATBA sədri çıxışında yerli və xarici turizm obyektləri ilə işbirliklərindən də söz açıb:

"Bu illər ərzində bizim Dövlət Turizm Agentliyi, "Azərbaycan Hava Yolları", "Azərbaycan Dəmir Yolları" QSC kimi qurumlarla uğurlu əməkdaşlıqlarımız olub, eləcə də çox sayda turizm qurumları ilə birlikdə layihələrimiz həyata keçirilib. Ölkəmizin çox gözəl, maraqlı, hətta bəzən çoxlarının tanımadığı yerləri insanlarımıza çəkib göstərdik. Xarici ölkələrdən çox sayda dəvətlər aldıq. Blogerlərimiz dünyanı gəzib Azərbaycan izləyicisinə təqdim etdi, eyni zamanda Azərbaycanı xaricdə təbliq etdilər. Bu işdə müxtəlif xarici ölkələrin Azərbaycandakı səfirliklərinin də dəstəyi oldu, birlikdə maraqlı layihələr icra etdik. 

Daha sonra Azər Qərib Azərbaycan Hava Yollarının rəhbəri Samir Rzayevin və Dövlət Turizm Agentliyinin sədri Fuad Nağıyevin təbrik məktublarını oxuyub.

Çıxışdan sonra yubiley tədbirinin bədii hissəsi baş tutub. Gecədə musiqili qonaqların ifalarına yer verilib. Səyahət blogerləri müxtəlif ölkələrin rəqslərini də ifa ediblər. Həmçinin gecədə müxtəlif yarışmalar keçirilib, qonaqlara hədiyyələr təqdim olunub.