Bizim investisiya əlaqələrimiz möhkəmlənir. Azərbaycanın Qazaxıstan iqtisadiyyatına investisiyalarının həcmi 225 milyon dollara çatıb.

Bu barədə Azərbaycan Respublikası İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Astanada keçirilən Qazaxıstan-Azərbaycan biznes forumunda bildirib.

Onun sözlərinə görə, Qazaxıstanın Azərbaycana investisiyaları 136 milyon dollar təşkil edib. Sevindirici haldır ki, bu investisiyaların hamısı Azərbaycanın qeyri-neft sektoruna yönəldilib.

“Həmçinin ötən il 300 milyon dollar kapitala malik birgə investisiya fondu yaradılıb. O, hər iki ölkə üçün maraq doğuran layihələri maliyyələşdirməyə hazırdır. Birbaşa işgüzar ünsiyyət üçün effektiv platformaya çevrilən Azərbaycan-Qazaxıstan İşgüzar Şurası tərəfdaşlığın möhkəmləndirilməsində mühüm rol oynayır. Şuranın üçüncü iclası bir daha sahibkarların birgə təşəbbüslərə və uzunmüddətli əlaqələrin möhkəmləndirilməsinə artan marağını təsdiqləyir”, - deyə o qeyd edib.

AZPROMO rəhbəri bildirib ki, bugünkü biznes forum hər iki ölkədən qida sənayesi, İKT, logistika, kənd təsərrüfatı, maliyyə, turizm, texnologiyalar, neft-qaz sektorunda fəaliyyət göstərən 100-dən çox şirkəti bir araya gətirib. Forum çərçivəsində artıq B2B və B2C görüşləri keçirilib.

“Son 10 ildə Azərbaycan istehsalın səmərəliliyinin artırılmasına və qlobal şəbəkələrə inteqrasiya olunmuş bilik iqtisadiyyatının yaradılmasına diqqət yetirərək sənayeləşməni dayanıqlı inkişafın əsasına çevirib. Sənaye zonalarının inkişafı və investisiyalar üçün stimullar texnologiyaların, ixtisaslı kadrların və infrastrukturun innovasiya və ixrac artımına töhfə verildiyi ekosistemlər yaradıb. Buna misal “Sənaye Mərkəzi 4.0”ün yaradılması layihəsini göstərmək olar. Azərbaycan fəal şəkildə yeni texnologiyaları tətbiq edib, sənayesini transformasiya edərək, regional və qlobal texnoloji mərkəzə çevrilməyə çalışır”, - deyə o vurğulayıb.

Y.Abdullayevin fikrincə, ümumilikdə effektiv platformalar xarici kapitalın cəlb edilməsində mühüm rol oynayır. “Biz, İxracın və İnvestisiyaların Təşviqi Agentliyi olaraq, artıq uzun illərdir bu vəzifənin üzərində işləyirik, sərmayə qoyuluşu və qarşılıqlı faydalı layihələrin inkişafı üçün şərait yaradırıq. Sentyabrda biz Prezident İlham Əliyevin himayəsi ilə Bakıda I Azərbaycan Beynəlxalq İnvestisiya Forumunu keçirdik. Forum çərçivəsində nail olunan razılaşmaların ümumi dəyəri 10 milyard dolları ötüb ki, bunun da 7 milyard dollarından çoxu xarici kapitalın iştirakı ilə qeyri-neft sektoru layihələrinə yönəldilib.

Biz Qazaxıstan tərəfinin bu tədbirdə iştirakını xüsusilə dəyərləndiririk. Forum çərçivəsində nail olunan razılaşmanın yekunlarına görə, Azərbaycan və Qazaxıstan şirkətləri arasında yüksək təmizləmə dərəcəsinə malik dəmir istehsalı üzrə birgə müəssisə yaradılacaq. Layihə üzrə sərmayə qoyuluşunun həcmi təxminən 700 milyon dollar qiymətləndirilir. Onu da qeyd edim ki, forum illik tədbirə çevriləcək və biz artıq 2026-cı ilə hazırlıqlara başlamışıq”, - deyə o, sözünü yekunlaşdırıb.

AZƏRTAC