Azərbaycan Dövlət Neft Fondu (ARDNF) “Franklin Templeton” ilə əməkdaşlıq çərçivəsində investisiya üzrə təhsil proqramına start verib.

ARDNF-dən Gazette.az-a bildirilib ki, hazırlanan proqram ARDNF-nin gələcəyə dair strateji baxışını “Franklin Templeton”un qlobal investisiya təcrübəsi ilə birləşdirərək, fondun seçilmiş əməkdaşlarına aparıcı mütəxəssislərdən öyrənmək, peşəkar bacarıqlarını inkişaf etdirmək və maliyyə dünyasında davamlı təsir yaratmaq imkanı təqdim edir.

“Bu təşəbbüs yalnız təlim proqramı olmaqla kifayətlənmir, həm də “Franklin Templeton” ilə strateji tərəfdaşlığımızda mühüm mərhələni ifadə edir və ARDNF-in beynəlxalq müstəvidə məsuliyyətli suveren sərvət fondu kimi mövqeyini daha da möhkəmləndirir”, - deyə qurumun yaydığı məlumatda bildirilir.

Qeyd edək ki, 1,64 trilyon dollar həcmində idarə olunan aktiv portfelinə malik olan “Franklin Templeton” dünyanın aparıcı investisiya qurumlarından biridir.