Şimali Makedoniyanın Struqa şəhərində təşkil edilən klublar arasında Avropa kubokuna yekun vurulub.

Ölkəmizi turnirdə kişilərin mübarizəsində təmsil edən “Vüqar Həşimov” klubu son turda qrosmeysterimiz Şəhriyar Məmmədyarovun heyətində çıxış etdiyi yerli “Alkaloid”lə qarşılaşıb və görüşdən qalib ayrılıb, 3,5-2,5.

Komandamızın heyətində Rauf Məmmədov, Kiril Şevçenko və Vüqar Əsədli görüşlərini heç-heçə başa vurublar. Əhməd Əhmədzadənin məğlub olduğu görüşdə Aydın Süleymanlı və Ülvi Sadıxov qələbə ilə ayrılaraq komandamıza qələbə qazandırıblar.

Bu nəticədən sonra xallarının sayını 11-ə çatdıran “Vüqar Həşimov” klubu Avropa kubokunu 3-cü pillədə tamamlayıb. Kuboka isə 7 turdan sonra 13 xal toplayan Rusiyanın “Mednyi Vsadnik” klubu sahib olub. Ruslardan 1 xal geri qalan Çexiya təmsilçisi “AVE Novy Bor” turnirin gümüş medalına yiyələnib.

Şəhriyar Məmmədyarovun şərəfini qoruduğu “Alkaloid” klubu AK-nı 8-ci, digər qrosmeysterimiz Nicat Abasovun heyətində çıxış etdiyi “Silla” (İspaniya) klubu isə 9-cu pillədə başa vurub.

Qeyd edək ki, Avropa kubokunda yüksək nəticə əldə edən komandamızın heyətində Rauf Məmmədov, Aydın Süleymanli, Vüqar Əsədli, Ulvi Sadıxov, Əhməd Əhmədzadə, Murad İbrahimli və ukraynalı şahmatçı Kiril Şevçenko çıxış ediblər.