İslandiyanın paytaxtı Reykyavikdə şahmat üzrə fərdi açıq Avropa çempionatının 5-ci turunun oyunları keçirilib.

GAZETTE xəbər verir ki, qitə birinciliyinin bu turunda qrosmeysterimiz Rauf Məmmədov 4 turdan sonra turnir cədvəlinə liderlik edən Ermənistan təmsilçisi Robert Hovanesyana ağ fiqurlarla qalib gəlib.

Bu qalibiyyətlə xalların sayını 4,5-ə çatdıran R.Məmmədov liderlər qrupunda qərarlaşıb.

Avropa çempionatında iştirak edən digər şahmatçılarımızdan Nicat Məmmədov Tarun Kanyamarala (İrlandiya), Nicat Abbasov Luka Nudesavlyeviç (Serbiya), Read Səmədov Tor Mari Aron (İslandiya) üzərində qələbə qazanıblar.

“Zəka sahiblərimiz”dən yalnız Aydın Süleymanlı turu məğlubiyyətlə başa vurub. O, rəqibi Ventura Souzaya (Portuqaliya) uduzub.

Qeyd edək ki, 5 turdan sonra N.Məmmədovun aktivdə 4, N.Abasovun 3,5, A.Süleymanlının və R.Səmədovun isə 2,5 xal var.

Xatırladaq ki, qitə çempionatında iştirak edən qrosmeysterimiz Vasif Durarbəyli yeni növ koronavirus infeksiyasına yoluxduğu üçün mübarizədən kənarlaşdırılıb.