Ermənistan parlamentinin avqustun 24-də keçirilən iclasında müxalifət fraksiyasını təmsil edən deputatlarla qanunverici orqanın təhlükəsizlik xidmətinin əməkdaşları arasında əlbəyaxa dava olub.

GAZETTE xəbər verir ki, buna səbəb müxalif deputat Anna Mkrtçyan Baş nazir Nikol Paşinyana sual verərkən hökumət başçısını sərt tənqid edərək “kapitulyant” kimi xoşagəlməz ifadələr işlətməsi olub.

Parlamentin sədri Alen Simoyan əvvəlcə Anna Mkrtçyanın mikrofonunu söndürüb və sonra onu iclas zalından çıxarmaq barədə təhlükəsizlik xidmətinə tapşırıq verib. Müxalif deputatlar buna etiraz edərək, A.Mkrtçyanı əhatəyə almaqla onun zaldan çıxarılmasına imkan verməyiblər. Mübahisəyə iqtidar deputatları da qoşulub və fiziki qarşıdurma yaşanıb.

Qarşıdurma zamanı müxalif deputatların “Nikol, sən satqınsan”, “Nikol, hakimiyyəti tərk et” kimi şüarlar səsləndirdikləri də eşidilib.

Dava zamanı bir neçə deputat xəsarət alıb.