Prezident İlham Əliyevin iyunun 23-də imzaladığı sərəncamla təltif olunan dövlət qulluqçuları arasında Azərbaycan Milli Elmlər Akademiyasının prezidenti, akademik İsa Həbibbəyilinin oğlu Ərəstü Həbibbəyli də var.

O, dövlət qulluğundakı xidmətlərinə görə “Tərəqqi” medalına layiq görülüb.

Qeyd edək ki, Ərəstü İsa oğlu Həbibbəyli 1980-ci ildə Naxçıvan şəhərində anadan olub. Naxçıvan şəhərində 12 saylı orta məktəbi bitirdikdən sonra 1997-2001-ci illərdə Bakı Dövlət Universitetinin Beynəlxalq hüquq və beynəlxalq münasibətlər fakültəsində bakalavr, 2001-2003-cü illərdə isə magistr pillələrində təhsilini davam etdirib.

2003-2006-cı illərdə Azərbaycan Milli Elmlər Akademiyasının İqtisadiyyat İnstitutunda beynəlxalq iqtisadi münasibətlər üzrə aspiranturada təhsil alıb. 2006-cı ildə “Azərbaycan Respublikasının Böyük Britaniya ilə xarici əlaqələrinin əsas istiqamətləri” mövzusunda namizədlik dissertasiyası müdafiə edərək iqtisad elmləri üzrə fəlsəfə doktoru alimlik dərəcəsi alıb.

2002-2007-ci illərdə İqtisadi İnkişaf Nazirliyində, 2007-2015-ci illərdə Prezident Administrasiyasının Xarici əlaqələr şöbəsində, 2015-2018-ci illərdə Prezident Administrasiyasının Xarici siyasət məsələləri şöbəsinin müdir müavini olub.

2018-ci ildə Baş nazirin Katibliyinin rəisi, 2024-cü ildə isə Nazirlər Kabineti Aparatının Humanitar məsələlər şöbəsinin müdiri təyin olunub.

Ailəlidir, üç övladı var.

Mürtəza