Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Qeyd - Sosial Maarifləndirmə” İctimai Birliyinin təşkilatçılığı ilə “Gənclərin səsi: Narkotiklərə Yox!” adlı genişmiqyaslı maarifləndirici tədbir keçirilib. Tədbirin əsas məqsədi gənclər arasında sağlam həyat tərzinin təbliği, narkotik vasitələrin zərərləri barədə maarifləndirmə işlərinin gücləndirilməsi və ictimaiyyətin diqqətini bu məsələyə yönəltmək olub.

Gazette.az xəbər verir ki, proqram çərçivəsində əvvəlcə  “Qeyd - Sosial Maarifləndirmə” İctimai Birliyin baş katibi Aysel Tahirova açılış nitqi ilə çıxış edərək gənclərin narkomaniyaya qarşı mübarizədə fəal rolunun vacibliyini vurğulayıb. Daha sonra təşkilatın təşəbbüsü ilə hazırlanmış sosial çarx nümayiş olunub.

Tədbir panel müzakirə və təlim formatında davam edib.

Paneldə Milli Məclisin deputatları Vüqar İskəndərov və Samir Vəliyev, Təhsil İnstitutunun direktor müavini İlham Cavadov, Ailə, Qadın və Uşaq Problemləri üzrə Dövlət Komitəsinin nümayəndəsi Rafiq Mahmudov, Dövlət Gömrük Komitəsinin şöbə rəisi Elmir Şirinov, Ədliyyə Nazirliyinin Bioloji ekspertizalar şöbəsinin rəisi Səbinə Qədirova, Gənclər və İdman Nazirliyinin aparıcı məsləhətçisi Zeynəddin Azaqov və Mətbuat Şurasının İdarə Heyətinin üzvü Hacıbəy Heydərli gənclərin narkomaniyadan qorunması istiqamətində görülən işlər və gələcək perspektivlər barədə çıxış ediblər.

Təlimdə isə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun nümayəndəsi Şahin İsmayılov çıxış edərək ölkədə narkotik vasitələrlə bağlı aparılan mübarizə tədbirlərindən, profilaktik işlərdən və gənclərin zərərli vərdişlərdən qorunması istiqamətində dövlət qurumlarının həyata keçirdiyi maarifləndirmə layihələrindən danışdı. O, narkomaniya ilə mübarizədə maarifləndirmənin və ictimai həmrəyliyin xüsusi rolunu vurğuladı.

Təlim çərçivəsində auditoriyaya həyat hekayəsi ilə ilham verən qonaq təqdim olundu. Tanınmış boksçu Cavid Tağıyev 14 il davam edən narkotik asılılığı ilə mübarizəsindən və bu çətin sınaqdan çıxaraq yaratdığı reabilitasiya mərkəzi vasitəsilə başqalarına dəstək olmaq yolundan bəhs etdi. Onun şəxsi təcrübəsi tədbir iştirakçıları üçün həm güc, həm də ümid nümunəsi kimi dəyərləndirildi.

Daha sonra psixoloq, “Ahəng” Psixoloji İnkişaf və Dəstək İctimai Birliyinin sədri Vüsalə Əmiraslanova mövzuya fərqli aspektdən yanaşaraq psixoloji dəstəyin əhəmiyyətindən, ailə institutunun gücləndirilməsinin vacibliyindən və cəmiyyətin birgə məsuliyyət daşımasının önəmindən danışdı. Onun sözlərinə görə, asılılıqdan qorunma və müalicə prosesində ailə və cəmiyyətin fəal iştirakı həlledici rol oynayır.

Tədbirin sonunda “Qeyd-Sosial Maarifləndirmə” İB sədri Tural Nurməmmədov “Gənclərin səsi: Narkotiklərə Yox!” layihəsi çərçivəsində təşkil olunan rəsm sərgisində və sosial çarxda fəallıq göstərən gənclərə Təşəkkürnamələr təqdim edib.

Layihə çərçivəsində görülən işlər gələcəkdə daha genişmiqyaslı maarifləndirici kampaniyaların aparılmasına zəmin yaradacaq.