"Apple"ın hələ rəsmi təqdim etmədiyi "iPhone 18 Pro Max" modeli ilə bağlı yeni sızıntılar texnologiya həvəskarlarının diqqətini çəkib. İnternetə sızdırılan daxili sənədlərdən məlum olub ki, şirkət bu dəfə əsas kamerada "iPhone"larda ilk dəfə istifadə olunacaq vacib yeniliyə yer verəcək.

"World Leaks" adlı  proqram qrupu tərəfindən internetə yayılan istehsalçı sənədlərində cihazın kamera sistemi ilə bağlı detallar yer alıb.

Sızdırılan məlumatlara görə, "iPhone 18 Pro Max" modelində əsas kamera kimi "Sony IMX905" sensorundan istifadə ediləcək. Ən maraqlı yenilik isə dəyişən diafraqma texnologiyasıdır. Bu sistem kameranın işıq qəbulunu çəkiliş şəraitinə uyğun avtomatik tənzimləyəcək. Nəticədə həm gecə, həm də gündüz çəkilən fotoların daha keyfiyyətli olacağı gözlənilir. Bu texnologiya bəzi "Android" flaqmanlarında artıq mövcud olsa da, "iPhone" modellərində ilk dəfə tətbiq ediləcək. 

Məlumata görə, "Apple" bu funksiyanın düzgün işləməsi üçün xüsusi kalibrləmə sistemindən istifadə edəcək. Sənədlərdə həmçinin qeyd olunur ki, əsas kamera istisna olmaqla digər kamera avadanlıqları "iPhone 17 Pro Max" modelindəki kimi qalacaq.

Belə ki, telefonda "Sony IMX973" telefoto kamerası, "Sony IMX972" ultra geniş bucaqlı kamera, "Sony IMX591" "LiDAR" sensoru və "Sony IMX914" ön kamera yer alacaq.

Telefoto kamera isə üçoxlu optik sabitləşdirmə (OIS) sistemi və piksel birləşdirmə texnologiyasını qoruyub saxlayacaq.

"Apple" hələlik bu məlumatları təsdiqləməyib. Şirkətin "iPhone 18" seriyasını 2026-cı ilin sentyabr ayında təqdim edəcəyi gözlənilir.

Bununla yanaşı, yeni modelin qiymətinin də artacağı ehtimal edilir. İddialara görə, kamera komponentləri və yaddaş istehsalının bahalaşması səbəbindən "iPhone 18 Pro Max" əvvəlki nəsillə müqayisədə təxminən 200 dollar daha baha satışa çıxarıla bilər.(yeni sabah)