Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Uşaqlara dair Strategiyanın həyata keçirilməsi üzrə 2020–2025-ci illər üçün Fəaliyyət Planı”na əsasən, uşaqların zərərli informasiyadan qorunması istiqamətində tədbirlərin gücləndirilməsi məqsədilə təlimlərə start verilib.

Komitədən Gazette.az-a verilən məlumata görə, təlimlər uşaq hüquqları və informasiya məhsullarının istehsalı sahəsində fəaliyyət göstərən dövlət və qeyri-dövlət orqanlarının əməkdaşları, ümumtəhsil müəssisələrinin psixoloqları, eləcə də yetkinlik yaşına çatmayanlarla iş üzrə inspektorlar üçün təşkil olunur.

Oktyabrın 6-dan 9-dək davam edəcək təlim proqramı beynəlxalq ekspert, professor Sophie Kiladze tərəfindən aparılır.

Təlimlərdə Sophie Kiladze tərəfindən uşaqların zərərli informasiyadan qorunması sahəsində Azərbaycan Respublikasında mövcud qanunvericilik bazası, bu sahədə beynəlxalq təcrübədə tətbiq olunan normativ-hüquqi sənədlər, informasiya məhsullarının yaş kateqoriyaları və təsnifatı, həmçinin müəllim və valideynlərlə işin təşkili kimi mövzular üzrə təqdimatlar keçirilir.

Dörd gün davam edəcək təlim proqramında 120 nəfər iştirak edir.

Təlimlərin sonunda iştirakçılara sertifikatlar təqdim olunacaq.