Oktyabrın 1-də futbol üzrə Azərbaycan Premyer Liqasının VI turuna “Zirə” – “Sumqayıt” oyunu ilə start verilib.

Zirə İdman Kompleksinin stadionunda keçirilən görüş meydan sahiblərinin 1:0 hesablı qələbəsi ilə başa çatıb. Qarşılaşmada yeganə qolu 14-cü dəqiqədə “Zirə”nin belçikalı yarımmüdafiəçisi Loris Bronyo vurub.

Turun 2-ci matçında “Keşlə” klubu “Sabah”ı qəbul edib. “ASK Arena”dakı qarşılaşma meydan sahiblərinin 2:0 hesablı qələbəsi ilə yekunlaşıb. “Keşlə”nin ilk qolunu 3-cü dəqiqədə Merab Giqauri vurub. Matçın 90+5-ci dəqiqəsində isə Felipe Santos fərqlənib.

Şənbə günü keçirilən turun 3-cü matçında son çempion “Neftçi” “Səbail”in qonağı olub və qarşılaşmadan 3:1 hesablı qələbə ilə ayrılıb. “Ağ-qaralar”ın heyətində Yusuf Laval 26-cı dəqiqədə hesabı açıb. Qonaqların yeni braziliyalı transferi Tiaqo Bezerra 45+1-ci və 78-ci dəqiqələrdə fərqlənməklə hesab arasındakı fərqi 3 topa çatdırıb. Matçın 90+5-ci dəqiqəsində Nikolas Raysel “Səbail”in təsəlli qolunu vurub.

Oktyabrın 3-də Premyer Liqanın 6-cı turunun oyunlarına “Qarabağ” – “Qəbələ” görüşü ilə yekun vurulub. “Azersun Arena”da keçirilən görüş Ağdam təmsilçilərin 2:0 hesablı qələbəsi ilə yekunlaşıb. Qurban Qurbanovun yetirmələrinin heyətində Abdulla Zubir (52′) və Ramil Şeydayev (66′) fərqləniblər.

Qələbə sayəsində xallarının sayını 14-ə çatdıran “Qarabağ” liderliyə yüksəlib. Aktivində 13 xal olan “Neftçi” turnir cədvəlinin 2-ci pilləsində qərarlaşıb. “Qəbələ” isə 11 xalla 3-cü pillədədir.