Kanada hökuməti Finlandiyanın telekommunikasiya avadanlığı istehsalçısı “Nokia” şirkətinə ölkədə beşinci nəsil mobil rabitə texnologiyası (5G) sahəsində tədqiqatların aparılması üçün 40 milyon Kanada dolları (30 milyon ABŞ dolları) təqdim edəcək.

Gazette məlumat verir ki, maliyyələşmə barədə yanvarın 25-də Davosda Dünya İqtisadi Forumu çərçivəsində Kanadanın İnnovasiya, elm və iqtisadi inkişaf naziri Navdeep Bains və “Nokia” şirkətinin rəhbəri Rajeev Suri arasında keçirilən görüşdə rəsmən elan edilib.

Məlumata görə, vəsaitlər “Nokia” şirkətinin Kanadada telekommunikasiya şəbəkələrinin “5G” texnologiyasının tətbiqinə hazırlamaq məqsədilə aparılan tədqiqatlarını dəstəkləyəcək, eləcə də şəbəkələrin mühafizəsi üçün kibertəhlükəsizlik alətləri yaratmağa kömək edəcək.

“5G” mövcud “4G” şəbəkəsini əvəz edəcək yeni nəsil rabitə şəbəkəsidir. Proqnozlara görə, şəbəkədən 2020-ci ildən etibarən bütün dünyada istifadə mümkün olacaq. Bundan sonra yalnız smartfonlar üçün optimallaşdırılan “4G” şəbəkəsindən fərqli olaraq milyardlarla qurğunun qoşulacağı “5G” şəbəkəsi məlumatların yüksək sürətlə ötürülməsini, zəif yubanma dərəcəsini, eləcə də enerjidən az istifadəni təmin edəcək.

Mənbə: ICTnews